BY NOKUTHABA DLAMINI
Kulokufuthelana kwabakubandla eliphikisayo eleCitizens Coalition for Change (CCC) kulandela ukufungiswa kukaMnumzana Tonderai Mutasa webandla leZanu PF eVictoria Falls, kungenziwanga ukhetho lwe-byelection lokudinga ukhansila kuWard 1.
UMutasa bekufuze ancintisane lo Mnumzana Ephias Mambume owebandla leCCC, kodwa obebhalise ukukhankasa ezimele. Ngenyanga edluleyo, esinye sezakhamizi sammangalela emthethwandaba ukuba kabhadali imithelo lamanzi ekhansilini, okwenza emalangeni inkundla yomthwethwandaba ephezulu inqume ukuba ufunyanwa elecala leli, okumthathela ilungelo lokuthi ancintise ngomthetho welizwe.
Lokhu kuhle kwapha igunya abe Zanu PF ukuba uMutasa afungiswe engavotelwangwa. Ngemva komcimbi lo, sixoxe loMnumzana Matthew Muleya ongumgcinisihlalo webandla le Zanu PF ngempumela le kanye lobukhohlakali obubikwa busenzakala edolobheni leli, okuyikho abeCCC abathi kuvinjelwe uMambume ngesizatho sokuba ubezabuveza.
“Kuyibufakazi kithi ukuba iZanu Pf iselempilo edolobheni leli, uMambume waxotshwa yi CCC, njalo ubengabhadali ama rates lamanzi, kithi yikho sakubona kumqoka ukuthi simuse emthethweni. Okokuthi kulobukhohlakakali lapha, asikwazi thina ngoba besivele silokhansila oyedwa abanye bengabe CCC, so siyathaba ngoba sebezikhulumele bodwa ukuba bayatshotsha.”
UMambume uthi wesulelwa nje icala angalaziyo. Ephendula ngokulotshiweyo, uthe usephanyeke edale le Supreme Court incwadi yokuphikisa isinqumo secala leli, ethi ebekhansilini besebenza labe Zanu PF bakupheka lokhu. Uthi usalinde ilanga lokuhlalelwa kwecala leli esima ngelokuthi ukhansila ukhethwa ngabantu, hatshi lokhu okwenzakeleyo.
Sixoxe loMnumzana Promise Mkhwananzi isikhulumeli seCCC, oveze ukuba yibuqili obenzakalayo, lokufiphazwa kwamalungelo oluntu.
“Kuvamile lokhu ukuthi inkudla yomthetho ingenele endabeni se politiki ikakhulu emabandleni aphikisayo njalo lokudelela umthetho sisekelo welizwe ngokwalela izizalwane ukuba zizikhethele ezimfunayo. Sizamile ukuba uMambume azimele yedwa, kodwa ngoba besesaba umongameli Nelson Chamisa, benze ngabomo ukumvimba, okunye njalo bafihla inkohlakalo ezenzakala edolobheni leli besebenza beyi cabal
“Izanu Pf ifana lamanye nje amabandla njenge Zapu, CCC. Asibuyeli emuva siya eSupreme Court ukuze sifake kuma records ethu ukwephulwa komthetho njalo sisazobaqonda nhla abe judiciary ngalokhu kusiyaphambili.”
Sibuze ohola ikhansili ye Victoria Falls, uMnumzana Ronnie Dube, ukuzwa ngobukhohlakali lobu obuphakanyiswa nguMkhwananzi, oma ngelokuthi kusazogedl’amazinyo.
“Ngingeke ngiphawule ngokukhulunywe nguMkhwananzi engingamaziyo, okuqakathekileyo yikuthi uma inyamanza isifa iyaqhatsha. Uqhatsha laye uMambume iqiniso yikuthi akutshoyo nge corruption thina siyi public entity njalo kulemthetho ebekwe nguhulumende ukudila lakho lokho. Loba ngubani olubufakazi obubambekayo engaya kuZACC engayi kusocial media ngoba kayila sixazululo.”
Ukugcotshwa kuka Mutasa, yena oyale ukhululuma lomsakazo lo, kubeyisiphangiphangi, nanku ngoba ihlekana ebelikulinkundla yokufungiswa kwakhe belingelebandla le Zanu PF kuphela, okuyikho abebandla le CCC abathi kukhombisa ukuba kukhona okunuka santungwana.
Sixoxe laye umamangalela uMambume, uMnumzana Akim Mutorera, othi ukungakhokhi kukaMambume wazibonela yedwa, kodwa wehlukelile ukuchaza ukuba ukoloda imali enganani.
Inhlanganiso ezimeleyo eye Victoria Falls Combined Residents Association ibingekho kuluncimbi, njalo bathe abasoze bayibambe ngekhanda, bazaphendula bengazwisisa okuyikho kanye okwenzakalayo.
SOURCE| VOA